د کونړ ولایت د اسعداباد ښار پراختیايي ستراتیژیک پلان لاسلیک او ویزه شو
۱۴۴۷/۰۵/۲۹
د کور او ښار جوړولو وزارت محترم وزیر الحاج مولوي نجیبالله حیات حقاني د کونړ ولایت د اسعداباد ښار ستراتیژیک پلان او نقشه امضاء او ویزه کړه.
د اسعدآباد ښار ستراتیژیک پلان، چې د دې وزارت د انجنیرانو له لوري طرحه او ترتیب شوی، د یاد ولایت د راتلونکي ښاري انکشاف لپاره یو مهم سند بلل کېږي.
محترم الحاج مولوي نجیبالله حیات حقاني د خپلو خبرو پر مهال څرګنده کړه چې د دې ستراتیژیک پلان چمتو کول د ښار د پراختیا او ښاري ودې لپاره یو مهم ګام دی او د دغه ولایت د قانونمند، منظم او اوږدمهاله ښاري اړتیاوو ته به اغېزمن ځواب وي.
یاد ستراتیژیک پلان د کونړ ولایت لپاره یو بنسټیز ښاري رهنمود دی چې د ښاري معیارونو، ټولنیزو، اقتصادي، چاپېریالي مطالعاتو او تخنیکي سروېګانو پر بنسټ طرحه شوی او د وزارت له لوري امضاء شوی دی.
د ملي جامع پلان ریاست محترم رئیس انجنیر رحمتالله قدیري وايي، چې دا پلان د کور او ښار جوړولو وزارت د محترم وزیر مولوي نجیب الله حیات حقاني د لارښوونې پر اساس په دقیق ډول سره یې بیاکتنه وشوه او اصلاح شو، او په کې د عصري ښاري ودې مهمې کارونې لکه د استوګنې سیمې، سوداګریزې ساحې، دولتي ادارې، پارکونه او د دغه ولایت د طبیعي ښکلا او منظري د خوندي کولو او د کورنیو او بهرنیو سیلانیانو د جلبولو لپاره مهم تفریحي ځایونه په پام کې نیول شوي دي.
د کور او ښار جوړولو وزارت څرګندوي چې ښاري پلانونه د معیاري اصولو له مخې طرحه کوي، اړوندو ښاروالیو ته یې د تطبیق لپاره سپاري او د تطبیق له بهیر څخه جدي څارنه کوي.
