په اجرستان او مالستان ولسوالیو کې د اوبو د تنظیم ۱۳ پروژې بشپړې شوې
۱۴۴۷/۰۵/۲۷
د غزني ولایت د کور او ښار جوړولو ریاست محترم رئیس مولوي نور ولي بلال متقي وایي، د دې ریاست اړوند تخنیکي ټیم د غزني ولایت د کور او ښار جوړولو ریاست او اړونده ادارو د تخنیکي ټیم له خوا په اجرستان او مالستان ولسوالیو کې د کانالونو، سربندونو، استنادي او ګبیوني دیوالونو اړوند ۱۳ پروژې وڅارلې.
ښاغلي مولوي متقي وویل، یادې پروژې د پین همکاری موسسې په مالي ملاتړ بشپړې شوې دي او ټولې ودانیزې چارې یې تر بشپړېدو وروسته رسماً د ګټې اخیستنې لپاره سپارل شوې دي.
د نوموړي په خبره، دا پروژې د اوبو د تنظیم، د کرنیزو ځمکو د خړوبولو، او د طبیعي پېښو لکه سېلابونو او د ځمکې ښویېدنې د مخنیوي په برخه کې د پام وړ اغېزه لري. همدارنګه، تمه کېږي چې د سیمه ییزو کروندګرو د عوایدو په زیاتوالي کې مهم رول ولوبوي.
د کور او ښار جوړولو وزارت د ولایتونو په کچه د اوبو د مدیریت او د کرنیزو پروژو د ودې لپاره د کانالونو، استنادي دیوالونو او ګبیوني جوړښتونو د ودانیزو چارو څارنه کوي، څو د اقلیم د ناوړو اغېزو مخنیوی وشي او د خلکو ژوند او کرنیز فعالیتونه خوندي وساتل شي.
