په غزني ولایت کې د عامې روغتیا ریاست د احاطې دیوال له ودانیزو چارو څارنه وشوه
۱۴۴۷/۰۵/۱۵
د غزني ولایت د کور او ښار جوړولو ریاست محترم رئیس مولوي نور ولي بلال متقي وایي، د دې ریاست اړوند تخنیکي ټیم د عامې روغتیا ریاست د احاطې د دیوال او سایبان د جوړولو له پروژې څخه تخنیکي څارنه ترسره کړه.
ښاغلي مولوي متقي وویل، د څارنې پر مهال څرګنده شوه چې د سایبان د پايې جوړښت د قرارداد له تخنیکي مشخصاتو سره سم نه دی درول شوی. له همدې امله، قراردادي شرکت ته لارښوونه وشوه چې یادې پایې ونړوي او د قرارداد او نقشې له مخې یې بېرته په سمه توګه جوړې کړي.
مولوي نور ولي بلال متقي ټینګار وکړ چې د پروژې ټولې چارې باید د انجینري اصولو، نقشې او د قرارداد د شرایطو مطابق ترسره شي، تر څو د کار کیفیت او ساختماني خوندیتوب یقیني شي.
د کور او ښار جوړولو وزارت د ساختماني پروژو د کیفیت او خوندیتوب د تضمین لپاره د دوامداره تخنیکي څارنې او نظارت پروګرامونه عملي کوي.
