د اندړو ولسوالۍ د انصاري ښوونځي له رغنیزو چارو څخه تخنیکي نظارت ترسره شو
۱۴۴۷/۰۴/۲۵
د غزني ولایت د کور او ښار جوړولو ریاست محترم رئیس مولوي نور ولي بلال متقي وایي، د دې ریاست اړوند تخنیکي ټیم د انصاري ښوونځي رغنیزې پروژې له بهیر څخه تخنیکي نظارت ترسره کړ.
ښاغلي مولوي متقي وویل، د تخنیکي ټیم د څارنې پر مهال څرګنده شوه چې د ودانۍ د ډبرین کار (سنگکاری) او د درسي صنفونو د تختو جوړولو چارې په جریان کې دي، چې د کارونو کیفیت د نقشې او تخنیکي مشخصاتو له مخې وارزول شو.
د نوموړي په خبره، تخنیکي ټیم د ساختماني چارو د لا ښه پرمختګ او د کار د کیفیت د لوړوالي په موخه، د قراردادي شرکت مسؤلینو ته لازمې لارښوونې وکړې.
د غزني ولایت د کور او ښار جوړولو ریاست د ښوونیزو او عامه تاسیساتو د ترمیم او بیارغونې پروژو د کیفیت د څارنې په برخه کې منظم فعالیتونه لري، چې د اندړو ولسوالۍ د انصاري ښوونځي رغینزې پروژه هم د همدې لړۍ یوه مهمه برخه ده، چې موخه یې د زده کوونکو لپاره د مناسب تعلیمي چاپېریال برابرول دي.
