په کونړ ولایت کې د زلزله ځپلو لپاره د کورونو د جوړولو له چارو څارنه وشوه
۱۴۴۷/۴/۲۰
کونړ ولایت کې د کور او ښار جوړولو ریاست محترم رئیس مولوي نبي الله طلحه وایي، کونړ ولایت کې د اسلامي امارت له لوري د پنځه دېرش اعشاریه نهه میلیونه افغانیو په لګښت (۳۵.۹) د زلزله ځپلو کورنیو لپاره د کورونو په جوړولو کار روان دی.
ښاغلی مولوي طلحه وایي، د استوګنې د ښه کولو په موخه د څوکۍ ولسوالۍ په دیوه ګل او د نورګل ولسوالۍ په مزار دره کې په لومړي قدم کې د پنځوسو کورونو د جوړولو چارې پیل شوې دي.
نوموړی وایي، د یادو کورونو نقشه د کور او ښار جوړولو وزارت له لوري ترسره شوې چې دوه اطاقه او درې اطاقه کورونه دي او یو یو دهلیز هم لري.
محترم طلحه زیاتوي، چې تمه ده د دوه میاشتو په اوږدو کې د دغه کورونو چارې بشپړې او ګټې اخیستنې ته وسپارل شي.
په پام کې ده، چې دا کورونه به هغو کورنیو ته ورکړل شي، چې په کونړ کې د وروستۍ زلزلې له امله یې کورونه بشپړ ویجاړ شوي دي.
تمه ده چې د پروژې د پلي کېدو له لارې به زلزله ځپلو خلکو ته د اوسېدو مناسب شرایط برابر شي او د هغوی د ژوند کیفیت به لوړ شي.
قراردادي شرکت هم ژمنه کړې، چې ورسپارل شوې چارې به د نقشې مطابق او په پوره کیفیت سرته ورسوي.
