د کابل ښار پنځمې ناحیې اړوند سیمو کې د ښاري تخلفاتو مخنیوی وشو
۱۴۴۷/۴/۲۰
د کور او ښار جوړولو وزارت، له ښاري تخلفاتو د مخنیوي ریاست محترم رئیس مولوي عبدالمنان حقاني وایي، ګډ تخنیکي ټیم یې د کابل ښار د پنځمې ناحیې اړوند ساحو کې د ښاري تخلفاتو د مخنیوي لپاره، د یادې ناحیې له بېلا بېلو برخو څارنه وکړه.
ښاغلی مولوي حقاني وایي، د څارنې ساحې کې خوشحال خان سیمه (د پولیتخنیک پوهنتون مخامخ)، د شمع چوک او د پنځمې ناحیې شاوخوا سیمې شاملې وې.
نوموړی وایي، په ځینو ودانیو کې د کارونې د نوعې بدلون او د ټاکل شوي لوړوالي څخه د زیات لوړوالي تخلفات تر سترګو شول.
محترم مولوي عبدالمنان حقاني وایي، د عامه پوهاوي پلاوي د پروژې مالکینو ته د رسمي جواز اخیستلو او د ساختماني اصولو او معیارونو د مراعت اهمیت په اړه لازمې لارښوونې وکړې.
دغه راز، د ودانیو مالکینو ته سپارښتنه شوې چې خپل رسمي اسناد او جوازونه د ښاري تخلفاتو د مخنیوي ریاست ته وسپاري، څو وروسته د تصویب شويو پلانونو سره د سمون له مخې د احتمالي تخلف په صورت کې اړوند قانوني اقدامات ترسره شي.
د کور او ښار جوړولو وزارت له ټولو هېوادوالو غواړي چې د پروژو د پلي کولو په مهال ښاري قوانین او اصول په پام کې ونیسي او هڅه دې نه کوي چې ښار بې نظمه شي.
