جوزجان ولایت کې د ښاري تخلفاتو د مخنیوي په موخه څارنیز فعالیتونه ترسره شول

۱۴۴۷/۳/۲۲

د کور او ښار جوړولو وزارت، له ښاري سرغړونو د مخنیوي ریاست محترم رئیس مولوي عبدالمنان حقاني وایي، د ریاست اړوند تخنیکي ټیم یې په جوزجان ولایت کې، له تفصیلي پلان سره سم د(i) پروژې له ساحې څخه څارنه او ارزونه وکړه.

ښاغلی مولوي عبدالمنان حقاني وایي، په دغه څارنه کې د ولایت محترم مقام، امنیه قومندانۍ، ښاروالۍ، د فواید عامې ریاست، او د اوبو او انرژۍ ریاست محترمو استازو هم ګډون کړی وو.

نوموړی وایي، موخه دا وه، څو د کارونو روڼتیا، همغږي، او د ناقانونه ودانیو مخنیوی یقیني شي.

محترم حقاني وویل، د تفصیلي پلانونو پر اساس د پروژې تطبیق وڅارل شو، او هغو وګړو ته چې د ودانیزو چارو پیل ته چمتو وو، خبرتیا ورکړل شوه چې باید له خپلسرو او له اجازې پرته جوړښتونو څخه ډډه وکړي.

هغه وایي، خلکو ته سپارښتنه وشوه چې خپل ساختماني فعالیتونه د کور او ښار جوړولو له ریاست او له ښاروالۍ سره په همغږۍ ، او د تصویب شویو نقشو پر بنسټ ترسره کړي.

د کور او ښار جوړولو وزارت ټینګار کوي، چې د ښاري او ساختماني تخلفاتو د مخنیوي په موخه به څارنه دوامداره وي، او ژمن دی چې د نظم، قانونیت او ښاري انضباط د تأمین لپاره به خپلې هڅې لا زیاتې او ګړندۍ کړي.