د کابل د نوي ښار د پراختیا لپاره نوی رئیس و ګمارل شو
۱۴۴۷/۰۳/۱۶
د مسکن ودانیزو چارو او د برنامو د پراختیا په معینیت کې د نوي کابل ښار د پراختیا ریاست د رئیس په توګه محترم مولوي محمد بلال محمدي معرفي شو او رسما یې خپله دنده پیل کړه.
د نوموړي په معرفت غونډه کې د کور او ښار جوړولو وزارت محترم وزیر الحاج مولوي نجیب الله حیات حقاني او د دې وزارت یو شمېر رئیسانو او کارکوونکو هم ګډون کړی وو.
په پیل کې د کور او ښار جوړولو وزارت محترم وزیر خبرې وکړې او ویې ویل، د اسلامي امارت په نظام کې د مسئولیتونو سپارل د مصالحو، صداقت او اخلاص پر بنسټ وي او د ادارو ترمنځ بدلون او تبدیل یو ضروري او طبیعي امر دی.
ښاغلي وزیر د نوي کابل ښار د پراختیا د پخوانیو مسئولینو او کار کوونکو له هڅو او خدمتونو مننه وکړه او زیاته یې کړه چې هغوی د نوي ښار د پروژې د پرمختګ او پلي کولو په برخه کې ارزښتناک خدمتونه ترسره کړي دي.
نوموړي له ټولو اړوندو رئیسانو او کار کوونکو وغوښتل چې له نوي رئیس سره په صمیمانه او مؤثر ډول همکاري وکړي او د کاري بهیر د لا ښه پرمخ وړلو لپاره پوره همغږي ولري.
محترم وزیر په خپلو خبرو کې د مولوي محمد بلال محمدي پخواني خدمتونه، صداقت، تعهد او د مسئولیت منلو وړتیا هم وستایله.
وروسته، د نوي کابل ښار د پراختیا نوی رئیس محترم مولوي محمد بلال محمدي هم خبرې وکړې او ژمنه یې وکړه چې د ورکړل شویو دندو د ترسره کولو په برخه کې به په صداقت، اخلاص او بشپړ احساس او مسئولیت کار کوي.
ورپسې انجنیر احمد جاوېد زاهد، چې تر دې وړاندې یې د کابل د نوي ښار د پرختیا ریاست سرپرستي کوله، هم خبرې وکړې او یې ویل چې د پروژو د پلي کېدو او ورځنیو چارو د پرمخ وړلو په برخه کې به له نوي رئیس سره پوره همکاري او همغږي ولري.
یاده دې وي چې مولوي محمد بلال محمدي د کور او ښار جوړولو وزارت د وړاندیز او د افغانستان د اسلامي امارت د ریاسة الوزرا محترم عالي مقام د منظورۍ له مخې د کابل د نوي ښار د پراختیا د رئیس په توګه ټاکل شوی دی.
