د عادي او پراختیایي بودیجې د لګښت او پرمختګ په اړه غونډه وشوه
۱۴۴۷/۰۳/۴
د کور او ښار جوړولو وزارت د محترم مالي او اداري مرستیال الحاج محمد ارسلاح خروټي په مشرۍ ، د یوشمېر اړوندو ریاستونو ترمنځ غونډه وشوه، چې په کې د روان کال لپاره د عادي او پراختیایي بودیجې د لګښت، اړتیاوو او پرمختګ په اړه خبرې وشوې.
په غونډه کې، مالي ریاست د شته عادي او پراختیایي بودیجې او د لګښت په اړه یې معلومات وړاندې کړل او په دغه برخه کې یې د لارښوونې او همکارۍ غوښتنه وکړه.
ښاغلي مالي او اداري مرستیال الحاج محمد ارسلاح خروټي وویل، دا چې د روان کال په منځ کې قرار لرو او اړتیا ده چې د عادي او پراختیایي بودیجې د لګښت په اړه ځان باوري کړو، نو لازمه ده چې هر ریاست په خپلو چارو کې دقت او چټکتیا رامنځته کړي، انوایسونه اجراء شي او پروژې په خپل وخت او بشپړ کیفیت سرته ورسېږي.
په غونډه کې برخوالو ریاستونو هر یو یې د خپلې اړوندې پروژې د وضعیت په اړه معلومات وړاندې کړل او په ځینو هغه برخو کې چې له ستونزو سره مخ کېدل د لارښوونې غوښتنه یې وکړه.
ښاغلي مرستیال وویل، هغه پروژې چې چارې یې د پرمختګ په حال کې دي او انوایسونه یې نه دي اجراء شوي، لازمه ده چې د انوایسونو د اجراء لپاره لاس په کار شي او د چارو په سلنه کې پرمختګ راولي.
د کور او ښار جوړولو وزارت اړوندو پروژو کې د شته ستونزو حل، د وخت غځېدل، زیات کاري، د انوایسونو ترسره کېدل، د ریاستونو ترمنځ د همغږۍ او همکارۍ کچې زیاتول، هغه موارد وو، چې په غونډه کې پرې هر اړخیز بحثونه وشول.
د کور او ښار جوړولو وزارت اړوند شاوخوا شل پروژې دي، چې تر کار لاندې دي او تمه ده چې د روان کال لپاره به په کې د پام وړ پرمختګونه رامنځته شي او ځینې هغه به یې ګټې اخیستنې ته وسپارل شي.
