مهاجرینو لپاره د دایمي استوګنې په پار د اسکان دایمي کمیټې ناسته وکړه
۱۴۴۷/۰۲/۲۷
د کور او ښار جوړولو وزارت د محترم وزیر الحاج مولوي نجیب الله حیات حقاني په مشرۍ د دایمي استوګنې کمېټې ناسته وکړه، چې په کې د کډوالو چارو وزارت، کرنې مالدارۍ او اوبو لګولو وزارت، کلیو بیارغونې او پراختیا وزارت، د ښاروالیو چارو د انسجام ریاست، د اوبو رسولو امارتي شرکت، د چاپیریال ساتنې ریاست او د استخباراتو عمومي ریاست محترمو استازو ګډون درلود.
په ناسته کې، د هغو مستحقینو کډوالو لیست چې له محترمو والیانو سره شریک شوی، د تفصیلي پلان له مخې په ښارګوټو کې د خداتو وړاندې کولو پروسې او څرنګوالي او دغه راز راتلونکو پلانونو هر اړخیزې خبرې وشوې.
د اسکان دایمي کمېټې په مشرۍ د کور او ښار جوړولو وزارت محترم وزیر الحاج مولوي نجیبالله حیات حقاني په خپلو مقدماتي خبرو کې وویل، د مهاجرینو د ستونزو حل کمېسیون له لوري د اسکان دایمي کمېټې ته د ورسپارل شوي لیست مطابق د اړمنو کورنیو لیست اړوند ولایتونو ته استول شوی، خو د شوي تفکیک او تصفیې په اړه یې بېرته ډاډ نه دی ورکړل شوی.
ښاغلي وزیر وویل، که دا چاره په وخت ترسره شي، نو مهاجرینو ته د کېدونکو راتلونکو اقداماتو په ترسره کولو کې به هڅې لا ګړندۍ شي.
د اسکان دایمي کمېټې منشي ښاغلي انجنیر محمد فهیم زکریا، په یو شمېر ولایتونو کې د ترسره شوو چارو، لګښتونو او پلانونو په اړه معلومات وړاندې کړل او د راتلونکو اقداماتو په تړاو یې موضوعات له ګډونوالو سره شریک کړل.
د پورته یادو شوو موضوعاتو په اړه د غونډې ګډونوالو خپل نظرونه څرګند کړل او تصمیم ونیول شو، چې د اسکان دایمي کمېټه به د مهاجرینو د ستونزو حل عالي کمېسیون ته د ترسره شوو چارو، شته ستونزو او نیمګړتیاو او حل لارو په تړاو وړاندیز وکړي، تر څو چارې لا اغېزمنې او ګټورې شي.
محترم وزیر مولوي نجیبالله حیات حقاني د خپلو خبرو په دوام وویل، د مهاجرینو د ستونزو حل د ا.ا له مهمو لومړیتوبونو څخه ده، چې په خبره یې باید په پوره دقت، شفافیت او عدالت سره پر مخ ولاړه شي.
