په کابل ښار کې د برېښنا شبکو د تخنیکي څار پر مهال تخلفات په نښه شول
۱۴۴۷/۲/۲۴
د کور او ښار جوړولو وزارت، له ښاري تخلفاتو د مخنیوي ریاست محترم رئیس مولوي عبدالمنان حقاني وایي، د ریاست اړوند تخنیکي ټیم یې په کابل کې د پلان شوې کاري اجنډا پر بنسټ د برېښنا د زیربنایي شبکو د څار په لړ کې، د یکهتوت د سرګروپیت د دولسم جنکشن اړوند برجونه له نږدې وڅارل.
ښاغلی مولوي حقاني وایي، دغه هیئت د خپلو څارنو په مهال، د برجونو ( قلعه حبیب تقویتي برج، د یکهتوت مرکزي برج، د قلعه چمن برج، د زنآباد قابل بای برج، د زنآباد برج او د قلعه سلطان علي برج) څخه لیدنه وکړه.
نوموړی وایي، په یادو څارنو کې، تخنیکي هیئت د برېښنا شبکې په تړاو اته (۸) موارد تخلفات په ګوته کړل.
د توزیعي ترانسفارمرونو شاوخوا کې د محافظتي جال (فنس) نه شتون، د میتر بکسونو خلاص پاتې کېدل، د ۱۵ زره او ۴۰۰ ولټه کیبلونو سره د ونو تماس، په زنآباد قابل بای او قلعه سلطان علي برجونو کې د لایتنینګ اریسټر نه شتون، د ۴۰۰ ولټه برېښنايي کیبلونو د حریم نه رعایت، د ۱۵ زره ولټه برېښنايي کیبلونو د حریم نه رعایت، د سړک د پاسه په ټیټه ارتفاع کې د ۴۰۰ ولټه کیبلونو تېرېدل، او د معیاري حدودو څخه په زیات واټن کې د ۴۰۰ ولټه کیبلونو غځول د استیشنونو څخه تر مشترکینو پورې، هغه سرغړونې دي، چې ترسره شوي دي.
له ښاري تخلفاتو د مخنیوي محترم رئیس مولوي عبدالمنان حقاني وایي، یاد تخنیکي ټیم څرګنده کړه، چې د ټولو یادو برجونو په جوړښت کې د ۱۵ زره ولټه کیبلونه د هوایي سیستم له لارې، او د ۴۰۰ ولټه کیبلونه په مختلط ډول (هوایي او ځمکني) نصب شوي دي.
نوموړي هیله څرګنده کړه، چې په نږدې راتلونکي کې به د اړوندو ادارو په همغږۍ د دغو تخلفاتو د له منځه وړلو لپاره عملي ګامونه پورته شي.
