د هېواد په کچه (۲۵۷) د تېلو پمپ سټېشنونو ته د فعالیت اجازه ورکړل شوه
۱۴۴۶/۰۹/۲۳
د کور او ښار جوړولو وزارت د ښاري چارو محترم معینیت د ښاري نقشو د ویزه کولو کمېسیون د ټول هېواد په کچه (۲۵۷) د تېلو پمپ سټېشنونو ته د فعالیت اجازه ورکړه.
د دغه کمېسیون سکرتر محترم انجنیر بدلون امیري وایي، په تېر کې د تېلو پمپ سټېشنونو د نورمونو او معیار خلاف فعالیت کاوه چې، ګڼ شمېر ستونزې یې رامنځته کولې.
نوموړی وایي، د ښاري چارو د محترم مرستیال شیخ مدارعلي کریمي بامیاني په مشرۍ د ښاري نقشو د ویزه کولو کمېسیون له ایجاد تر دې دمه ۲۵۷ د تېلو او ګازو پمپ سټېشنونو ته د فعالیت اجازه ورکړه.
دوی وایي، هڅه کوي چې په ټول هېواد کې د تېلو پمپ سټېشنونه په معیار برابر کړي او یو د بل څخه کافي واټن ولري او خلکو ته اړین خدمات وړاندې کړي.
د ښاري چارو محترم معینیت وایي، دا چاره به لامل شي چې، په هېواد کې د تېلو او اوبل ګازو د سوداګرۍ لارې چارې او د خدماتو وړاندې کولو سیستم یې معیاري شي.
د تېلو په پمپ سټېشنونو کې خوندیتوب رامنځته کول، یو له بل څخه کافي واټن درلودل، د اور وژنې سیستم فعال ساتل، له سړک په کافي اندازه لیرې والی او داسې نور شرایط او معیارونه هغه څه دي چې، د کور او ښار جوړولو وزارت یې عملي کېدا ته لومړیتوب ورکوي.
