د ښار جوړولو او ځمکو وزارت سرپرست د ترکیې هېواد له سفیر سره وکتل
۱۴۴۳/۱۰/۱۵
د ښار جوړولو او ځمکو وزارت محترم سرپرست مولوي حمد الله نعماني د یاد وزارت په مقر کې د ترکیې هېواد له سفیر جهاد ارګین ای سره وکتل او له افغانستان او په ځانګړې توګه د ښار جوړولو او ځمکو وزارت سره د ترکیې هېواد پر همکاریو یې خبرې وکړې.
په لیدنه کې خبرې وشوې چې څنګه کېدای شي د تریکې ساختماني شرکتونو لخوا د نیمه کاره پاتې پروژو چارې بشپړې شي.
دغه راز خبرې وشوې چې ترکیې شرکتونه او پانګوال په افغانستان کې د مسکن او ښاري پراختیا برخو کې پانګونه وکړي.
د ښار جوړولو او ځمکو وزارت سرپرست ښاغلي مولوي حمد الله نعماني وویل، له ټولو ملي او نړیوالو پانګوالو ملاتړ کوي چې غواړي په افغانستان کې پانګونه وکړي او دوی به ورته ټولې اسانتیاوې برابرې کړي.
مولوي حمد الله نعماني په کابل کې د ترکیې له سفیر غوښتنه وکړه چې د ترکیې هېواد په تېر کې د ښار جوړولو او ځمکو وزارت سره د مسکن، ښاري پراختیا او کدستر برخو کې درې تفاهم لیکونه ترتیب کړي چې باید لاسلیک او عملي شي.
نوموړي د ترکیې له سفیر جهاد ارګین ای وغوښتل چې د یادو تفاهم لیکونو د پلې کولو ترڅنګ دې د ترکیې دوست هېواد د تاریخي ابداتو بیا رغونې او ساتنې، مسکن جوړولو او ښاري پراختیا برخه کې د ښار جوړولو او ځمکو وزارت سره همکاري وکړي.
په کابل کې د ترکیې هېواد سفیر جهاد ارګین ای وویل، هېواد یې له افغانستان سره د ښاري پراختیا، مسکن جوړولو، او د تاریخي ابداتو په بیارغونه او ساتنه کې همکاري کوي او په وینا یې لازمه ده چې په له ښار جوړولو او ځمکو وزارت سره ترتیب شوي درې تفاهم لیکونه وکتل شي او د ستونزو نه موجودیت په صورت کې عملي شي.
نوموړي یادونه وکړه چې د ښار جوړولو او ځمکو وزارت سره به په اړیکه کې وي، د ترکي ساختماني شرکتونو ستونزې او ننګونې په وڅېړي او په ټپه ولاړې پروژې به پیل کړي.
دواړو خواوو لازمه وګڼله چې د شته ستونزو د حل او چارو پیلېدو په موخه باید ګډه کمېټه جوړه شي چې د پروژو په اړه څېړنه وکړي او د پیلولو په موخه یې حل لارې وړاندې کړي.
