د استقلال او رحمن مېنې له نیمه کاره بلاکونو او ښارګوټو لیدنه وشوه
۱۴۴۳/۰۹/۰۶
د ښار جوړولو او ځمکو وزارت محترم سرپرست مولوي حمد الله نعماني په کابل اتمه ناحیه کې د استقلال او رحمن مېنې له نیمه کاره بلاکونو او ښارګوټو لیدنه او ارزونه وکړه.
ښاغلي وزیر مولوي حمد الله نعماني له دغې لیدنې څخه موخه دا وه چې څنګه کولی شي د یادو نیمه کاره بلاکونو او ښارګوټو پاتې چارې بشپړې او ګټې اخیستنې ته چمتو کړي.
مولوي حمد الله نعماني د استقلال او رحمن مېنې ښارګوتو په اړه د وزارت له اړوند مسؤلینو او مسلکي کسانو سره مشورې پیل کړي او پر هغه لارو چارو غور کوي چې وکولی شي په اغېزمنه توګه د یادو بلاکونو او ښارګوټو پاتې چارې بشپړې کړي.
وزیر نعماني وویل، که یاد بلاکونه په اغېزمنه توګه او هر اړخیز لحاظ چمتو شي د بې سرپناه خلکو د بې سرپناهۍ ستونزه به حل او ملي عواید به زیات شي.
د رحمن مېنې او استقلال بلاکونو او ښارګوټو طرحه او ډیزاین په معیاري شکل برابر شوي او تر ډېره په کې د ژوند اسانتیاوې په پام کې نیول شوي دي.
د یادونې وړ ده چې یاد ښارګوټي او بلاکونه یې د جمهوریت په مهال پیل شوي وو چې د بېلا بېلو دلایلو له امله یې د رغېدو چارې په ټپه ولاړې دي.
اوس د اسلامي امارت په بیا حاکمیت او د ښار جوړولو او ځمکو وزیر په توګه د ښاغلي مولوي حمد الله نعماني له ګمارنې وروسته هڅې ګړندۍ شوي چې له ښارګوټو چې بیت المال دی، سالمه ساتنه وشي، خلک ارام ژوند ولري او یو باثباته اقتصادي افغانستان رامنځته شي.
