په کابل ښار کې د څو پوړیزو ودانیو په تهکوۍ کې د موټرو د تمځای جوړولو موضوع وڅېړل شوه
۱۶/۱۱/۱۴۴۷
په کابل ښار کې د څو پوړیزو ودانیو په تهکوي کې د موټرو د تمځای د جوړولو د څرنګوالي د ارزونې په موخه د یوې کمېټې غونډه ترسره شوه.
یاده غونډه د کور او ښار جوړولو وزارت د ښاري چارو محترم معین شیخ مدارعلي کریمي بامیاني په مشرۍ او د کابل ښاروالۍ، د ترانسپورت او هوايي چلند، مالیې، صنعت او سوداګرۍ، کورنیو چارو وزارتونو او د فرامینو او احکامو د څار لوی ریاست د استازو په ګډون ترسره شوه.
په غونډه کې ټینګار وشو چې د ښار په سړکونو کې د ګڼه ګوڼې یو مهم علت د موټرو تم کېدل او نامنظم تمځای دی، چې د حل لپاره د ریاسة الوزراء محترم عالي مقام د حکم له مخې د ودانیو په تهکوي کې د تمځای د جوړولو موضوع تر ارزونې لاندې ده.
د ښاري چارو محترم معین وویل چې د تمځای جوړول به د ښاري ترانسپورټ اسانتیاوې رامنځته کړي او د ښار د ګڼه ګوڼې په کمولو کې به مهم رول ولوبوي.
په غونډه کې ګډونوالو د کابل ښار د ترافیکي ستونزو د کمولو لپاره بېلابېل نظرونه وړاندې کړل، چې له مخې یې د کابل منډوي انتقال، د ښار په څنډو کې د سوداګریزو ساحو پراختیا، د تمځای د بدیلو ساحو جوړول، طبقوي تمځایونه او د ځینو امارتي ادارو انتقال د ښار له مرکزي برخو څخه د ګڼه ګوڼې د کمېدو مهمې لارې وبلل شوې.
همداراز پرېکړه وشوه چې د کابل ښار په بېلابېلو ساحو کې ودانۍ له تخنیکي پلوه یو ځل بیا په دقیق ډول وڅېړل شي او راپور یې د ریاسة الوزراء عالي مقام ته وړاندې شي.
