د ښار جوړولو او ځمکو وزارت سرپرست په مشرۍ د رهبرۍ غونډه وشوه
د ښار جوړولو او ځمکو وزارت سرپرست محترم محمود کرزي په مشرۍ او د دې وزارت د مرستیالانو او رئیسانو په ګډون د رهبرۍ جلسه تر سره شوه.
په دې غونډه کې لومړی د دفتر سرپرست رئیس محترم محمد غوث غوثي د جمهوري ریاست عالي مقام د مصوبو او هدایاتو د پلي کولو څرنګوالي او د ښار جوړولو او ځمکو وزارت د ژمنو په اړه معلومات وړاندې کړل.
د ښار جوړولو او ځمکو وزارت سرپرست ټولو اړوندو معینیتونو او ریاستونو ته لارښوونه وکړه چې د جمهوري ریاست عالي مقام مصوبو او هدایاتو په پلي کېدو کې چټک ګامونه پورته او د خپلو کړنو په اړه د وزارت مقام ته ډاډ ورکړي.
ورپسې مالي او اداري مرستیالې اغلې خاطرې سادات د کور جوړولو، قبالې اجرا او صدور، د ښاري پراختیا پلانونو پلي کېدو، د ځمکو او څړځایونو ثبت، د املاکي عوایدو په اړه راپور جوړولو، د ټولګټو پروژو استملاک او د ۱۳۹۹ مالي کال بودجې د مصرف اړوند د جلالتمآب ولسمشر د هدایاتو په اړه معلومات ورکړل.
محترم محمود کرزي یاد شوي موارد مهم وګڼل او ټولو معینیتونو او ریاستونو ته یې دنده وسپارله چې د یادو شویو مواردو په پلي کېدو کې اقدام وکړي. په همدې ترتیب مالي او اداري مرستیالې ته لارښوونه وشوه چې له نورو معینیتونو سره په همغږۍ د ۱۳۹۹ مالي کال بودجې په مصرف کې جدي توجه وکړي.
ورپسې د ښار جوړولو چارو مرستیال محترم روښان ولسمل په سمون کړنلاره کې د اصلاحاتو او د نوي تشکیل اړوند په ښاري پلانونو کې د تعدیلاتو، د نمرو وېش برخه کې ښاروالیو ته د ځینو صلاحیتونو سپارلو، د ښاري پراختیا پلانونو د حقالزمي معافیت، د ټوپوګرافي سروې کړنلارې او د جغرافیايي نقشو برابرولو کړنلارې او ښاري پلانونو په اړه معلومات ورکړل او د ښار جوړولو او ځمکو وزارت د رهبري له لوري ټول یاد شوي موارد یې د منلو وړ وګڼل.
ورته مهال، د کور جوړولو چارو مرستیال محترم عزیز احمد ګلستاني او د ساختماني چارو مرستیالې اغلې سحر همدرد د لنډمهاله او اوږدمهاله پورونو له لارې د کورونو تمویل، د افغاني دستګاه ودانۍ د کرایې ورکولو او ملي پراختیا شرکت ته د ساختماني پروژو د لېږد په اړه معلومات ورکړل.
د ښار جوړولو او ځمکو وزارت سرپرست کورجوړولو چارو معینیت ته لارښوونه وکړه چې له ارشاد، حج او اوقافو وزارت، علیې وزارت او سترې محکمې سره د کرایې په اړه په همغږۍ کار وکړي. په همدې ترتیب، ساختماني چارو معینیت ته لارښوونه وشوه چې د افغاني دستګاه ودانۍ د کرایې ورکولو او تخليې په اړه له جمهوري ریاست عالي مقام څخه یو وړاندیز واستول شي او تر څنګ یې د هدایت په اړه ترې غوښتنه وشي. سربېره پر دې ساختماني چارو معینیت ته لارښوونه وشوه چې ملي انکشاف شرکت او چارو ادارې ته د پروژو د لېږد څرنګوالي په اړه ځانګړي مکتوبونه واستول شي.
په پای کې د ښار جوړولو او ځمکو وزارت سرپرست محترم محمود کرزي تر کار لاندې پروژو د پلي کېدو، د ورځنیو چارو په چټکیا او د جمهوري ریاست عالي مقام د هدایاتو او مصبو پر عملي کولو ټینګار وکړ.
