د ټاپی پروژې د چارو د چټکتیا لپاره به ډېر ژر درې اړخیز تفاهملیک لاسلیک شي
په هغه غونډه کې چې په همدې مناسبت د ښار جوړولو او ځمکو په وزارت کې ترسره شوه، د ټاپي پروژې د چارو د چټکتیا لپاره د ښار جوړولو او ځمکو وزارت، د کانونو او پټرولیم وزارت او د TPCL شرکت ترمنځ د درې اړخیز تفاهلیک په اړه خبرې وشوې.
دا غونډه د ښار جوړولو او ځمکو وزارت سرپرست وزیر محترم محمود کرزي په مشرۍ او د یاد وزارت د ښاري چارو او ځمکوالۍ چارو مرستیالانو، د کانونو او پټرولیم وزارت د ټاپي پروژې مشر او د TPCL شرکت د اجراییه رئیس ښاغلی محمد مایرت امانوف په ګډون جوړه شوه.
په دې غونډه کې، محترم محمود کرزی ټاپي یې د افغانستان حکومت یو له مهمو پروژو څخه وباله او زیاته یې کړه چې دا پروژه به د خلکو پر ټولنیز ژوند د هېواد پر اقتصادي ودې مستقیم اغیزه پریږدي.
محترم محمود کرزی، د دې پروژې د ښه تطبیق لپاره د اړینو فرصتونو برابرول یې د ښار جوړولو او ځمکو وزارت او د کانونو او پټرولیم وزارت ګډ کار وباله او د یادې پروژې په تړاو د چارو د چټکتیا لپاره اړونده مسوولینو ته لارښوونه وکړه.
ورپسې، د ټاپی پروژې د تطبیق کوونکي شرکت اجراییوي رئیس ښاغلی محمد مایرت امانوف پر عملي کارونو او د چارو پر چټکتیا ټینګار وکړ او زیاته یې کړه چې د پروسې د ښه مدیریت او د موافقتنامو د محتوا د نهایي کولو لپاره باید د دریو لورو لخوا یو ګډ تخنیکي ټیم رامنځته شي.
نوموړي وویل چې د پروژې د ښه مدیریت او د چارو څخه د دوامداره نظارت او ارزونې په موخه باید د ښکیلو ادارو د لوړ پوړو استازو په ګډون د رهبرۍ کمیټه رامنځته شي او دا کمیټه په منظمه ټوګه د چارو د ښه ارزونې، د ستونزو د حل او د لازمو پرېکړو لپاره غوڼدې ترسره کړي.
په پام کې ده چې د درې اړخیز تفاهملیک د لاسلیک او د ټاپي پروژې د قانون سره سم، پر دوو موافقتنامو کار پیل چې له دې سره به د ټاپي پروژې په مسیر کې د ځمکو د استملاک او اجاره ورکولو چارې تنظیم او مدیریت شي.
###
