کاپیسا ولایت کې له یوې ودانیزې پروژې څارنه وشوه
۱۴۴۷/۵/۶
کاپیسا ولایت کې د کور او ښار جوړولو ریاست محترم رئیس انجنیر مرتضی صافی وایي، د ریاست اړوند تخنیکي ټیم یې د دغه ولایت په تګاب ولسوالۍ کې د فرهنګي مرکز د جوړولو له چارو لیدنه وکړه.
ښاغلی انجنیر صافی وایي، د پروژې څخه د لیدنې موخه دا وه چې د کار کیفیت او د پروژې د پرمختګ ارزونه وشي.
نوموړی وایي، دمګړۍ پروژه کې د ودانۍ د لومړي پوړ د چت او فریمونو قالب تړل او د چاپېریالي دېوال جوړولو کارونه روان دي.
دغه راز هغه زیاتوي، د ریاست د استازو له لوري د ساحې مسؤل انجنیر ته په جدي توګه لارښوونه وشوه چې د خپلو کارونو سرعت زیات کړي، څو د ژمي له رارسېدو وړاندې د ودانۍ مهمې ودانیزې چارې بشپړې شي.
محترم انجنیر مرتضی صافی وایي، تخنیکي ټیم یې ټینګار وکړ، چې ټول کارونه باید د منظور شوې نقشې او انجنیري اصولو مطابق ترسره شي او سربېره پر دې، د کار کوونکو د خوندیتوب وسایل برابر او عملي شي.
