کابل کې د عزیزي کمپلیکس جوړولو د کارونو د چټکتیا په موخه ناسته وشوه
1446/2/17
د کور او ښار جوړولو وزارت محترم سرپرست وزیر شیخ حمدالله نعماني په مشرۍ ، کابل کې د عزیزي کمپلیکس جوړولو کمېټې ناسته وکړه.
په ناسته کې، د کرنې، اوبو لګولو او مالدارۍ محترم وزارت او د کابل محترمې ښاروالۍ استازو هم برخه اخیستې وه.
په یاده ناسته کې، د کرنې، اوبو او مالدارۍ وزارت اړوند د اراضۍ له استازو سره د ملکیت د تفکیک او تثبیت په اړه خبرې وشوې او د کارونو د ځنډ او د ستونزو د حل پر څرنګوالي تفصیلي بحث وشو او ټولو اړخونو خپل نظرونه شریک کړل.
په دغه ناسته کې، د کور او ښار جوړولو وزارت محترم سرپرست وزیر شیخ حمدالله نعماني، د کور او ښار جوړولو وزارت، د کابل ښاروالۍ او د اراضۍ له محترمو استازو یو ګډ هئیت ته دنده وسپارله، تر څو هر څه ژر ساحه له نږدې وګوري او د ځمکې تفکیک او تثبیت پیل کړي.
د عزیزي خیریه بنسټ، په پام کې لري چې د کابل ښار، اتمې ناحیې، رحمن مېنې په شاوخوا (۳۵۰) درې سوه او پنځوس جریبه ځمکه کې پوهنتون، روغتون، دارالایتام، ښوونځي، لیلیه او هستوګنیزه ساحه، جوړ کړي.
