کابل ښار کې د اماراتو ښارګوټي د مسجد شریف له ودانیزو چارو څارنه ترسره شوه
۱۴۴۷/۱۰/۲۶
د کور او ښار جوړولو وزارت د ساختماني او زیربنایي چارو د تطبیق د څار ریاست اړوند تخنیکي ټیم له لوري، د دوامداره تخنیکي څارنو په لړ کې د کابل ښار په ۱۵مه ناحیه کې د اماراتو ښارګوټي (شیخ خلیفه بن زاید آل نهیان) د جومات د اعمار د پروژې د ودانیزو چارو ساحوي څارنه ترسره شوه.
دغه څارنه د کور او ښار جوړولو وزارت اړوند د ښاري سرغړونو د مخنیوي او د پروژو پر تطبیق د څار محترم عمومي ریاست د هدایت پر بنسټ ترسره شوه.
د څارنې پر مهال د پروژې په ساحه کې د بنسټ (تهداب) د کیندنې او لیول کولو چارې، د ساختماني موادو انتقال او د سیخ ګول نمونې اخیستنه د لابراتواري ازموینو لپاره ترسره شوې وې، چې یاد فعالیتونه د تخنیکي ټیم له لوري وڅارل شول او ساحه د راتلونکو ساختماني پړاوونو لپاره چمتو وبلل شوه.
یاده پروژه د کور او ښار جوړولو وزارت له لوري تمویلېږي او د پروګرامونو د انسجام ریاست تر مدیریت لاندې تطبیقېږي، چې د هغې د خط اچونې چارې د سروی او جي ای ایس ریاست تخنیکي ټیم له خوا ترسره شوې دي.
دغه پروژه د کابل ښار د ۱۵مه ناحیې اړوند،د قصبې په سیمه کې موقعیت لري.
د څارنې په ترڅ کې ساحوي انجنیرانو ته لازمې لارښوونې وشوې، څو چارې د قرارداد له تخنیکي اسنادو، ملي او نړیوالو معیارونو او د کار د خوندیتوب اصولو سره سم پرمخ یوسي.
د ساختماني او زیربنایي پروژو د ودانیزو چارو دوامداره څارنه د کار د کیفیت د لوړولو، د معیارونو د رعایت او د پروژو د معیاري تطبیق لپاره مهمه بلل کېږي.
