ښار جوړولو او ځمکو وزارت سرپرست وزیر د ارشاد، حج او اوقافو وزارت سرپرست وزیر سره وکتل
ښار جوړولو او ځمکو وزارت سرپرست وزیر محترم محمود کرزی د ارشاد، حج او اوقافو وزارت سرپرست وزیر محترم محمد قاسم حلیمي سره وکتل او د ځمکو د انتقال او د یاد وزارت د جایدادونو د ثبت په اړه خبرې وکړې.
په دې کتنه کې، د ارشاد، حج او اوقافو وزارت سرپرست وزیر محترم محمد قاسم حلیمي د کورنیو چارو وزارت څخه د حجاجو د مجتمع لپاره د ځمکې د انتقال، د یاد وزارت د ودانۍ لپاره د اته جریبه ځمکې انتقال، د کابل ولایت په ده سبز ولسوالی کې د حجاجو د مجتمع د جوړولو لپاره د یوې ځانګړې سیمې تثبیت، په موقتي توګه د ارشاد، حج او اوقافو وزارت ته د نشه یي توکو سره د مبارزې وزارت د ودانۍ انتقال او د وقفي ځمکو د ثبت په اړه معلومات وړاندې کړل او د یاد وزارت له مشرتابه د همکارۍ غوښتنه وکړه.
ورپسې، ښارجوړولو او ځمکو وزارت سرپرست وزیر محترم محمود کرزی د ځمکوالۍ چارو معینیت ته لارښوونه وکړه ترڅو د حجاجو د مجتمع د جوړولو په موخه د کورنیو چارو وزارت څخه د ځمکې د انتقال په برخه کې له دې وزارت سره هر اړخیزه همکاري وکړي.
په همدې ترتیب، د ارشاد، حج او اوقافو وزارت د ودانۍ جوړولو لپاره ژر تر ژره دې د اړتیا وړ اته جریبه ځمکې ده تصفیه کړي.
همدارنګه، محترم محمود کرزی د کابل ولایت په ده سبز ولسوالی کې د حجاجو د مجتمع د جوړولو لپاره د یوې ځانګړې سیمې تثبیت په اړه وویل چې د نوي کابل ښار د ماستر پلان جزيیات دې د ارشاد، حج او اوقافو وزارت سره شریک او د سیمې د ټاکلو سربېره، دې وزارت سره د ټوپوګرافي سروې، کروکي اخېستلو او د یو منظم پلان په جوړونه کې همکاري وشي.
سربېره پردې، محترم محمود کرزی، خصوصي سازي ریاست ته لارښوونه وکړه ترڅو ارشاد، حج او اوقافو وزارت ته په موقت ډول د نشه یي توکو سره د مبارزې وزارت د ودانۍ انتقال په برخه کې مرسته وکړي.
د دې کتنې په پای کې، ځمکوالۍ چارو معینیت ته لارښوونه وشوه ترڅو ټولې وقفي ځمکې د ځمکو بانک له لارې سروې او ثبت شي او د دې وزارت ټولو ولایتي ریاستونو ته دې په رسمي بڼه ابلاغ شي چې د ارشاد، حج او اوقافو وزارت له موافقې پرته هیڅ وقفي ځمکه دې نورو موخو لپاره ځانګړې نشي.
###
