پکتیا ولایت کې د تحصیلي او روغتیايي دوو پروژو رغنیزې چارې دوام لري
ښارجوړولو او ځمکو وزارت د پکتیا ولایت په مرکز کې د حقوقو پوهنځي ودانۍ او د دې ولایت په احمد خېلو ولسوالۍ کې د BHC روغتیايي کلینیک رغنیزې چارې تر کار لاندې لري.
د احمد خېلو ولسوالۍ روغتیايي کلینیک رغنیزې چارې چې تازه پیل شوي په ۲۰۸ متر مربع ځمکه کې په یو پوړ د ۱۰ میلیونه او ۸۰۰ زره افغانیو په ارزښت د عامې روغتیا وزارت له بودیجې جوړیږي.
همداراز د پکتیا د حقوقو پوهنځي ودانۍ په ۲۱۵ متر مربع ځمکه کې په درې پوړونو د ۷۴ میلیونه افغانیو په ارزښت د لوړو زده کړو وزارت له بودیجې جوړیږي چې رغنیزې چارې یې له ۵۰ سلنه اوښتې دي.
ښارجوړولو او ځمکو وزارت د هېواد په کچه د روغتیايي کلینیکونو، د دولتي ادارو ودانیو، لوبغالو، موزیمونو، کتابتونونو، وړکتونونو، جوماتونو او تعلیمي او تحصیلي مرکزونو په جوړولو کې خورا مهمه ونډه درلوده او د تولګټو تاسیساتو جوړول د دې وزارت په کاري لومړیتوبونو کې دي.
###
