په کندهار ولایت کې د مهاجرینو ښارګوټي دوهم فاز کې ۳۵۰ کسانو ته نمرې ووېشل شوې
۱۴۴۷/۰۳/۳۰
د کندهار ولایت د کور او ښار جوړولو ریاست محترم رئیس مولوي عبدالمتین سعید، وایي چې د دې ریاست اړوند تخنیکي ټیم د دامان ولسوالۍ په مهاجرینو ښارګوټي کې د دوهم فاز د نمرې وېش چارې ترسره کړې.
په دې لړ کې ټولټال ۳۵۰ کسانو ته د کور جوړولو لپاره نمرې ورکړل شوې دي،
د ښاغلي مولوي سعید په وینا، دغه وېش د کور او ښار جوړولو وزارت د منظور شوي پلان سره سم ترسره شوی دی.
همدارنګه د دوهم فاز ټول مساحت ۹۳۹،۳۹۳ مترمربع (۴۶۹.۶۹۷ جریب) دی، چې د پلان له مخې په کې د استوګنې، استوګنیزو، تجارتي مخلوط سیمو او نورو اړوندو برخو لپاره ځانګړې شوې ځمکې شاملې دي.
د کندهار ولایت په دامان ولسوالۍ کې د مهاجرینو ښارګوټی د هغو بې ځایه شویو او راستنو شویو کورنیو د اسکان لپاره جوړېږي چې د جګړو او ناامنۍ له امله له خپلو اصلي مېنو بې ځایه شوي دي، د کور او ښار جوړولو وزارت په څو پړاوونو کې د نمرې وېش چارې پر مخ وړي، څو د خلکو لپاره د معیاري استوګنې چاپېریال برابر کړي.
