په کاپیسا ولایت کې د محمود راقي ښارګوټي د ډبرو ایښوونې پروژې له چارو څارنه وشوه
۱۴۴۷/۰۴/۲۸
د کاپیسا ولایت د کور او ښار جوړولو ریاست تخنیکي ټیم د محمود راقي ښارګوټي د ډبرو ایښوونې پروژې له کارونو څخه لیدنه او تخنیکي څارنه ترسره کړه، چې موخه یې د کار د کیفیت ارزونه او د انجینري معیارونو رعایت ډاډمنول دي.
د کاپیسا ولایت د کور او ښار جوړولو ریاست محترم رئیس انجنیر مرتضی صافي وایي، د دې ریاست اړوند تخنیکي ټیم د محمود راقي ښارګوټي د ډبرو ایښوونې پروژې له روانو چارو څخه لیدنه وکړه.
په دغه پروژه کې د سړک د سطحې ډبرو ایښوونې ، د اړوندو جویچو جوړول او د سطحې هموارۍ چارې روانې دي. د تخنیکي ټیم د راپور له مخې، د کار عمومي بهیر د پلان او نقشې سره سم پرمخ روان دی او د موادو کیفیت د تخنیکي معیارونو مطابق ارزول شوی دی.
ښاغلي انجنیر صافي زیاته کړه چې د یادې پروژې موخه د ښار د سړکونو د تګ راتګ د اسانتیا رامنځته کول، د دوړو مخنیوی او د ښاري ښکلا زیاتول دي.
د کور او ښار جوړولو ریاست ډاډ ورکړی چې د محمود راقي ښارګوټي د ډبرو ایښوونې پروژه به د ټاکلي وخت په موده کې د ښه کیفیت سره بشپړه شي، او د ښار د اوسېدونکو لپاره به د تګ راتګ په برخه کې څرګنده اسانتیا رامنځته کړي.
