په پکتیکا ولایت کې د تفصیلي پلان خلاف له ودانیزو چارو مخنیوی وشو
۱۴۴۷/۰۵/۳
د پکتیکا ولایت د کور او ښار جوړولو ریاست محترم رئیس مولوي محمد طاهر سیفالجهاد وایي، د دې ریاست اړوند تخنیکي ټیم د مرکز ښرنې ښار د تفصیلي پلان خلاف د خپلسرو ودانیزو چارو په اړه څېړنه او اقدام ترسره کړی دی.
ښاغلي مولوي سیف الجهاد وویل، د مرکز ښرنې ښار په هغه ساحه کې چې د تفصیلي پلان له مخې د عیدګاه لپاره ځانګړې شوې، یو تن د ودانۍ د جوړولو چارې په خپل سر پیل کړې وې.
د نوموړي په خبره، د ښار د نظم د تأمین او د تفصیلي پلان د تطبیق په موخه، د موضوع له معلومېدو وروسته سمدستي د مرکز ښرنې ښاروالۍ ته خبر ورکړ، ترڅو د قانون له مخې اړین اجراآت ترسره کړي. د ریاست د استازو د وروستیو معلوماتو پر بنسټ، د یادې ودانۍ ودانیز کارونه اوسمهال درول شوي دي.
محترم مولوي محمد طاهر سیفالجهاد ټینګار وکړ چې د کور او ښار جوړولو ریاست د تفصیلي پلانونو د تطبیق او د ښاري سرغړونو د مخنیوي په برخه کې خپل قانوني مسؤلیتونه په پوره جدیت ترسره کوي او هیڅ ډول خپلسر ودانیز فعالیت به د قانون خلاف ونه زغمي.
د پکتیکا ولایت د کور او ښار جوړولو ریاست د ښارونو د منظم پرمختګ، ښاري نظم د تأمین، او د تفصیلي پلانونو د تطبیق د څارنې مسؤلیت لري. دا اقدام د همدې هدف په موخه ترسره شوی، څو ښاري ساحې د منظور شوو پلانونو له مخې تنظیم او ورغول شي، او د عامه تاسیساتو لپاره ځانګړې شوې ځمکې د خپل اصلي هدف لپاره وساتل شي.
