په قلعه نجارا کې د ساختماني چارو د قانوني وضعیت ارزونه ترسره شوه
۱۴۴۸/۵/۲
د کور او ښار جوړولو وزارت د کیفیت، کنټرول او ښاري سرغړونو د مخنیوي عمومي ریاست اړوند د ښاري سرغړونو د مخنیوي ریاست تخنیکي ټیم، د کابل ښار د یوولسمې ناحیې اړوند د قلعه نجارا څلورلارې، د حضرت علي (رض) جومات شاوخوا او فرعي کوڅو کې د روانو ساختماني چارو له بهیر څخه د کاري پلان له مخې څارنه او ارزونه ترسره کړه.
د څارنې پر مهال هغه ودانیزې چارې وڅېړل شوې چې د نافذه قوانینو، منظور شوو ښاري پلانونو او یا د ګاونډیانو د حریم د نقض احتمالي نښې پکې موجودې وې؛ په ځانګړي ډول د غیرقانوني کړکیو او د ګاونډیانو د حریم اړوند موارد وکتل شول.
له هغو ودانیو د مالکانو څخه هم وغوښتل شول چې رسمي اسناد، جوازونه او اړوند مدارک یې نه وو وړاندې کړي، خپل اسناد د ښاري سرغړونو د مخنیوي ریاست ته وسپاري.
د دې څارنې موخه د منظور شوو ښاري پلانونو له مخې د ودانیو د جوړولو ډاډ، د بې ځایه تراکم او ښاري بې نظمۍ مخنیوی، د ګاونډیانو د حریم او حقونو ساتنه او د ساختماني چارو د کیفیت لوړول دي.
د ښاري سرغړونو د مخنیوي ریاست تخنیکي ټیمونه به د یاد ریاست د رئیس په هدایت، د کاري پلان له مخې د کابل ښار په بېلابېلو ناحیو کې خپلو منظمې او هدفمندې څارنې ته دوام ورکړي او د هر ډول سرغړونې د تثبیت په صورت کې به د نافذه قوانینو له مخې لازم اقدامات ترسره شي.
