په فاریاب ولایت کې د پنځه پوړیزه سوداګریز مارکېټ له چارو څارنه وشوه
۱۴۴۷/۰۵/۰۵
د فاریاب ولایت د کور او ښار جوړولو ریاست محترم رئیس مولوي خال میرزا ذوالفقار وایي، د یاد ریاست تخنیکي ټیم د میمنې ښاروالۍ اړوند د پنځه پوړیزه سوداګریز مارکېټ د جوړولو له بهیر څخه څارنه ترسره کړې ده.
مولوي خال میرزا ذوالفقار، چې له خپل تخنیکي ټیم سره یو ځای یې د پروژې ساحه وکتله، وویل چې د مارکېټ د جوړولو چارې د انجینري نقشې او تخنیکي معیارونو پر بنسټ په چټکۍ روانې دي.
نوموړي زیاته کړه، چې تر اوسه د پروژې نږدې ۹۷ سلنه کار بشپړ شوی او قراردادي شرکت ته لازمي سپارښتنې ورکړل شوې دي څو پاتې چارې د نقشې، نورم او انجینري معیارونو سره سم بشپړې کړي.
یاده پروژه د میمنې ښاروالۍ لهخوا د فاریاب ولایت په مرکز کې د یو عصري پنځه پوړیزه سوداګریز مارکېټ په توګه عملي کېږي.
د دې مارکېټ جوړېدل به د ښار د سوداګریزو فعالیتونو د ودې، د ښاریانو د اسانتیاوو د زیاتېدو او د ښاري پرمختګ په برخه کې مهم رول ولوبوي.
