په غوښتل شوو تعدیلاتو کې دې ښاري معیارونه په پام کې ونیول شي
۱۴۴۶/۰۶/۰۹
د کور او ښار جوړولو وزارت د ښاري چارو د محترم مرستیال شیخ مدارعلي کریمي بامیاني په مشرۍ د ښاري نقشو د ویزه کولو کمېسیون غونډه وکړه او په یو شمېر ښاري موضوعاتو یې خبرې وکړې.
تفصیلي پلانونو او د بهسازۍ پلانونو کې د تعدیلاتو او د تېلو او ګازو د پمپ سټېشنونو د رامنځته کېدو پر لارو چارو هر اړخیزې خبرې وشوې.
د غونډې ګډونوالو په لوګر او میدان وردګو ولایتونو کې د ځینو ساحو پر تعدیل او خوندیتوب خبرې وکړې، چې لوګر کې دې سوداګریزې ساحې خوندي شي او په میدان وردګو کې دې د ترمینل ساحه له خدماتي په سوداګریزې تعدیل شي.
زابل کې د سلطان محمود کبیر ښارګوټي په تفصیلي پلان کې د نښو اېښودلو او لغمان ولایت کې په تفصیلي پلان کې د دامان قلعه شاملولو باندې خبرې وشوې.
د ښاري چارو محترم مرستیال وویل، په غوښتل شوو تعدیلاتو کې باید ښاري معیارونه په پام کې ونیول شي او د تعدیلاتو لپاره دې دقیق غور وشي.
په یاده غونډه کې یو شمېر هغه د تېلو پمپ سټېشنونه چې اسناد یې بشپړ شوي وو، تائید او ځینې هغه د اسنادو بشپړولو په موخه وځنډول شول.
