په سمنګان ولایت کې د مسجد شریف ودانیزې چارې و څارل شوې
۱۴۴۷/۴/۲
د سمنګان ولایت د کور او ښار جوړولو ریاست محترم رئیس مولوي محمد امین نوري وایي، د دې ریاست اړوند تخنیکي ټیم د ایبک ښار د ترانسپورټ ریاست په انګړ کې د مسجد شریف د جوړېدو له پروژې څخه څارنه وکړه.
ښاغلي مولوي نوري وویل، د څارنې پر مهال څرګنده شوه چې د ودانۍ اسکلیت د منظور شوې نقشې او احجامو سره سم تطبیق شوی او د ګنبد د جوړېدو چارې په جریان کې دي. همدارنګه د پرانه او خښتو کارونه د نقشې سره سم بشپړ شوي دي.
د یادولو وړه ده، د مسجدونو او ديني ودانیو جوړول د ټولنیزو اړتیاوو د پوره کولو ترڅنګ د ښار د ښکلا او منظم جوړښت برخه هم ګڼل کېږي. د کور او ښار جوړولو وزارت هڅه کوي چې دا ډول پروژې د منظور شوو نقشو او انجینري معیارونو په رڼا کې په ټاکلي وخت او ښه کیفیت سره بشپړې کړي.
