په دایکنډي کې د دوه ټولګټو پروژو رغنیزې چارې دوام لري
ښارجوړولو او ځمکو وزارت د دایکندي ولایت د سنګ تخت و بندر ولسوالۍ په چبراسک بازار کې د ۱۰۰۰ کسانو په ظرفیت د یو جومات رغنیزې چارې پیل او همداراز د دایکندي په مرکز نیلي ښار کې د یو روزنتون رغنیزې چارې ۷۵ سلنه بشپړې کړي دي.
د چبراسک بازار جومات په ۸۷۴ متر مربع ځمکه کې په یو پوړ د ۲۰ میلیونه او ۲۰۰ زره افغانیو په ارزښت د ښارجوړولو او ځمکو له پراختیايي بودیجې او د نیلي ښار روزنتون په ۱۲۶۰ متر مربع ځمکه کې په دوه پوړونو د ۶۵ میلیونه افغانیو په ارزښت د مالیې وزارت له پراختیايي بودیجې جوړیږي.
ښارجوړولو او ځمکو وزارت د هېواد په کچه د روغتیايي مرکزونو، د دولتي ادارو ودانیو، لوبغالو، کتابتونونو، موزیمونو، وړکتونونو، جوماتونو او تعلیمي او تحصیلي مرکزونو په جوړولو کې رغنده رول لوبولی او د ټولګټو پروژو تطبیق د دې وزارت په کاري لومړیتوبونو کې ځای لري.
###
