په جوزجان کې د آقچې ولسوالۍ د غلې منډوي مارکېټ د اعمار کارونه وڅارل شول
۱۴۴۷/۰۳/۰۶
د جوزجان ولایت د کور او ښار جوړولو ریاست محترم رئیس الحاج ملا عبدالله فیضان، د یاد ریاست اړوند تخنیکي انجنیرانو په ملتیا د آقچې ولسوالۍ د غلې منډوي مارکېټ د اعمار له پروژې څخه لیدنه وکړه.
ښاغلي ملا فیضان وویل، د څارنې پر مهال څرګنده شوه چې د مارکېټ د دوکانونو د دروازو د نصب چارې جریان لود، چې مسؤلینو ته لارښوونه وشوه ترڅو ټولې ودانیزې چارې د نقشې، د احجامو د براورد، د تدارکاتو د شرطنامې او د انجنیري نورمونو او معیارونو پر بنسټ تطبیق شي.
همدارنګه د ساحې انجنیرانو د پروژې د ښه والي او اغېزمنتیا لپاره یو لړ نظریات وړاندې کړل.
یاده پروژه د آقچې ولسوالۍ د ښاروالۍ په همغږۍ پر مخ ځي او هدف یې د سوداګرو او عامو خلکو لپاره د غلو د تبادلې او پلورلو یو معیاري چاپېریال رامنځته کول دي.
