پر مهاجرینو د ځمګو د وېش لړۍ میدان وردګ ولایت ته هم وغځېده

۱۴۴۷/۷/۱۴

د کور او ښار جوړولو وزارت محترم وزیر الحاج مولوي نجیب الله حیات حقاني، میدان وردګ ولایت ته د خپل سفر په ترڅ کې د دغه ولایت اړوند ثبت شوو مهاجرو کورنیو ته د ځمکو د وېش لړۍ پیل کړه.

په همدې موخه جوړو شویو مراسمو کې د میدان وردګو ولایت محترم والي مولوي خیرالله خیرخواه، د بېلابېلو وزارتونو او امارتي ادارو استازو او یو شمېر سیمه‌ییزو مسؤلینو ګډون کړی وو.

دا مهال په میدان وردګ ولایت کې (75) راستانه شوو مهاجرو کورنیو ته د ځمکو د وېش لړۍ پیل شوه.

دا لړۍ به په منظم ډول دوام وکړي او په راتلونکو پړاوونو کې به نورې مهاجرې کورنۍ هم تر پوښښ لاندې راشي او ګام په ګام به دغه چاره پرمختګ کوي.

میدان وردګو ولایت کې د مهاجرینو ښارګوټی په (800) جریبه ځمکه کې جوړ شوی او (1200) استوګنیزې نمرې په کې ډیزاین شوي دي.

دا ښارګوټی به د سلګونو کورنیو لپاره د امن، ثبات او نوي ژوند پیل او د راستنېدونکو مهاجرینو د باعزته مېشتېدو په لور یو بل مهم ګام وي.