ننګرهار کې د بېرته راستنېدونکو کډوالو لپاره ښارګوټی پرانستل شو
۱۴۴۶/۱۰/۱۵
د ریاسة الوزرا محترم عالي مقام ښاغلي اداري مرستیال مولوي عبدالسلام حنفي په مشرۍ ننګرهار ته تللي پلاوي د دغه ولایت په قاسم اباد سیمه کې د بېرته راستنېدونکو کډوالو لپاره په (3000) جریبه ځمکه کې د یوه استوګنیز ښارګوټي د جوړولو په موخه د بنسټ ډبره کېښوده.
د پرانستې په دې مراسمو کې، د ریاسة الوزرا محترم عالي مقام ښاغلي اداري مرستیال مولوي عبدالسلام حنفي وویل، په ټولو ولایتونو کې د بېرته راستنېدونکو کډوالو لپاره ښارګوټي په نظر کې نیول شوي، چې د ژوند ټولې اسانتیاوې به ولري.
ورپسې، د کور او ښار جوړولو وزارت محترم سرپرست وزیر الحاج شیخ حمدالله نعماني وویل، وزارت یې د ټولو ولایتونو لپاره د ښارګوټو نقشې ترتیب کړي، چې د ډېرو هغو یې سروې او خط اچونه ترسره شوې ده.
د یادولو ده، چې د کور او ښار جوړولو وزارت هڅې ګړندۍ کړي، څو د اجباري راستنېدونکو کډوالو لپاره د ښارګوټو په چوکاټ کې ځمکې تشخیص، سروې، انتقال او د یو منظم پلان له مخې یې ووېشي.
