محترم محمد جواد پیکار د بدخشان سیمهییز او د درایم ولسوالي سټراټیژیک پلانونه منظور کړل
د ښار جوړولو او ځمکو وزارت سرپرست محترم محمد جواد پیکار د بدخشان والي محترم ذکریا سودا سره په لېدنه کې پر یو لړ انکشافي برنامو وغږېدل.
په سر کې د بدخشان والي د ښارجوړولو وزارت له مقام څخه د فیض اباد ښار د خرقې جومات د جوړونې له کبله د مننې تر څنګ خپل وړاندیزونه وړاندې کړل.
ورپسې محترم محمد جواد پیکار وویل، د ښارجوړولو او ځمکو وزارت دا جومات په پر مختللي معیار جوړ کړی او د یاد جومات تر څنګ چې د فیض اباد ښکلا به نوره هم زیاته کړي، اوسنۍ اړتیاوې هم پوره کوي.
د ښارجوړولو او ځمکو سرپرست وزیر د فیضاباد ښار لپاره اوږد مهاله انکشافي لرلید د منظم انکشاف لپاره اړینه وباله او په ورته وخت کې یې اړوندو ادارو ته لارښوونه وکړه چې د یاد لرلید د جوړولو د مطالعې لپاره کاري ټیم واستوي او د دې تر څنګ یې ژمنه وکړه چې فیضاباد ښار به په راتلونکې پړاوونو کې په ستراتیژیک انکشاف پلان (SDF) کې شامل کړي.
محترم محمد جواد پیکار د جلالتمآب ولسمشر ژمنې ته په اشارې د فیض اباد عیدګاه جوړنې په اړه اړونده ادارو ته دنده وسپارله چې د عیدګاه لپاره په نظر کې نیول شوې سیمه مختلط سوداګریز او هستوګنیز پلان ته تعدیل کړي.
د ښارجوړولو او ځمکو وزارت سرپرست د بدخشان والي ته وویل، د جوماتونو او سپېڅلیو ځایونو وړاندیزونه وزارت ته راواستوي څو د روان کال په پلان کې شامل شي.
همداراز محترم محمد جواد پیکار یادونه وکړه چې د ښارجوړولو او ځمکو وزارت د بدخشان بېلا بېلو سیمو لپاره لس تفصیلي پلانونه جوړ کړي او اړوندو ادارو ته یې دنده وسپارله چې هر څه ژر یې د منظورۍ لپاره چمتو کړي.
د ښارجوړولو او ځمکو سرپرست وزیر د لېدنې په څنډه کې د درایم ولسوالي لپاره سټراټیژیک او د بدخشان ولایت لپاره سیمهییز پلانونه منظور کړل او د پلي کولو لپاره یې د بدخشان ولایت مسولانو ته وسپارل.
