له اداري فساد سره د درنو جرمونو د مبارزې عدلي او قضايي مرکز د کمپلکس د جوړولو طرحه تائید شوه
د جمهوري ریاست د عالي مقام د هدایت له مخې، له اداري فساد سره د درنو جرمونو د مبارزې عدلي او قضايي مرکز د کمپلکس د جوړولو طرحه چې د ښارجوړولو او ځمکو وزارت د عامه او دولتي ودانیو برنامې تخنیکي مشاور او د یادې پروژې طراح احمدضیا حامد او د هغه ټیم لوري جوړې شوه وه تائید شوه.
یاده طرحه د د دې وزارت د عامه او دولتي ودانیو برنامې د تخنیکي ټیم له لوري په هغه غونډه کې چې د لوی څارنوالی سرپرست محترم ذبیح الله کلیم، د ښارجوړولو او ځمکو وزارت ساختماني چارو معینې سحر همدرد او د عدلي او قضايي مرکز عمومي رئیس او اجرائیه رییس هم ګډون کړی و وړاندې شوه.
دا کمپلکس د کابل ښار په پنځلسمه ناحیه کې په «۷۰» جریبه ځمکه کې په پاخه او اساسي ډول رغول کېږي چې پکې معیاري دفترونه، د څېړنو معیاري خونې، د اداري او قضايي مجلسونو تالار، کنفرانس خونې، روزن ځایونه، روغتیايي مرکز، پخلنځی، د عامه اړیکو ودانۍ، انتظار خونه، جومات، ورزشي ساحه، د موټرو تم ځای، د ساتوونکو خونه، امنیتي برجونه، معیاري توقیف ځایونه او د سیمې عمومي لنډسکېپ په پام کې نیول شوی دی.
له اداري فساد سره د درنو جرمونو د مبارزې عدلي او قضايي مرکز کمپلکس په پنځه جلا بلاکونو کې په اسلامي سبک په نړېوالو معیارونو او سټندردونو طرح او ډیزاین شوی دی.
