فراه کې د یوې بنسټیزې پروژې کار بشپړ او د معارف یوې پراختیايي پروژې چارې دوام لري
ښارجوړولو او ځمکو وزارت د فراه ولایت په دریمه ناحیه کې د زراعتي بانک تر ماهي ها څلور لارې پورې د سړک پخولو چارې بشپړې او ګټې اخیستنې ته یې وسپاره.
دا پروژه د ۲۷۰ متره په اوږدوالي د ۱۷ میلیونه او ۴۰۰ زره افغانیو په ارزښت د مالیې وزارت پراختیايي بودیجې څخه بشپړه شوې ده.
په همدې ترتیب ښارجوړولو او ځمکو وزارت د فراه ولایت په پشت کوه ولسوالۍ کې د مطبخ ۸ صنفي ښوونځي رغنیزې چارې ۵۰ سلنه بشپړې کړي او د روان کال تر پایه به ګټې اخیستنې ته وسپارل شي.
دا پوړیزه ښوونځی په ۶۰۰ متر مربع ځمکه کې د ۱۷ میلیونه او ۹۰۰ زره افغانیو په ارزښت د ښارجوړولو او ځمکو وزارت د پراختیايي بودیجې څخه جوړیږي.
ښارجوړولو او ځمکو وزارت خلکو ته د اساسي خدمتونو د وړاندې کولو په موخه هر کال د ولایتونو په مرکز او ولسوالیو کې په سلګونه بنسټیزې پروژې تطبیق او عملي کوي.
###
