راتلونکې اونۍ په دامان ولسوالۍ کې د بې سرپناه کورنیو لپاره د ښارګوټي چارې پیلېږي
۱۴۴۵/۱۲/۲۷
دایمي اوسېدو لپاره د ځمکو د وېش کمېټې خپله لسمه ناسته وکړه، چې په کې د کندهار په دامان ولسوالۍ کې د بې سرپناه کورنیو لپاره د ښارګوټي جوړولو په تړاو په بېلا بېلو موضوعاتو خبرې وشوې او نظرونه شریک شول.
لومړی د اوبو او انرژۍ وزارت د محترمو استازو له لوري د کندهار په دامان ولسوالۍ کې د ترځمکې لاندې اوبو د کیفیت او کمیت په تړاو د ترسره شوو مطالعاتو په اړه وضاحت ورکړ، چې په خبره یې یاده سیمه کې تر ځمکې لاندې اوبه د څښاک لپاره مناسبې او تر ځمکې لاندې له ۳۵ تر ۴۰ مترو پورې اوبه ورکوي.
د یادې کمېټې مشر او د کور او ښار جوړولو وزارت محترم سرپرست وزیر الحاج شیخ حمدالله نعماني، د اوبو او انرژۍ محترم وزارت د مطالعاتو موندنو تر اورېدو وروسته په کمېټه کې شاملو وزارتونو او ادارو ته دنده وسپارله چې هر لوری خپل – خپل کارونه ترسره کړي.
په پام کې ده، چې راتلونکې اونۍ به د کندهار په دامان ولسوالۍ کې د بې سرپناه کورنیو لپاره د ښارګوټي د خط اچونې لړۍ پیل شي، هوار کاري به ترسره شي او د څښاک اوبو د ترلاسه کولو لپاره به لومړني اقدامات پیل شي.
د کور او ښار جوړولو وزارت محترم سرپرست وزیر الحاج شیخ حمدالله نعماني ټینګار وکړ، چې عملي اقدامات دې په چټکۍ پیل او په کم وخت کې دې ښارګوټی د ژوند کولو لپاره چمتو شي.
