د میدان وردګو ولایت د سردار داود خان ښارګوټي د بنسټیزو شبکو پلانونه منظور شول
۱۴۴۷/۸/۱
د کور او ښار جوړولو وزارت د ښاري زېربناوو د طرحې ریاست له لوري، د کاري پلان پر بنسټ، د میدان وردګو ولایت د سردار داود خان ښارګوټي لپاره د بنسټیزو شبکو جامع پلانونه ترتیب او طرحه شول، یاد پلانونه د نړیوالو معیارونو او تخنیکي کوډونو مطابق ډیزاین شوي او د کور او ښار جوړولو وزارت محترم وزیر الحاج مولوي نجیبالله حیات حقاني له لوري منظور او لاسلیک شول.
په توشیح شوو پلانونو کې د سردار داود خان ښارګوټي د اصلاح شوي سړک سازۍ پلان، د فاضلابو د شبکې پلان، د فاضلابو د تصفیې خونې پلان او همدارنګه د شنو ساحو د اوبولګولو پلان شامل دي، چې دغه پلانونه د ښارګوټي د منظم ښاري پراختیا، د عامه روغتیا د ساتنې، د چاپېریال د ککړتیا د مخنیوي او د ښاري خدماتو د معیاري کېدو په موخه ترتیب شوي دي.
د یادولو ده چې د ښارګوټي د بنسټیزو شبکو ټول پلانونه د ښاري زېربناوو د طرحې ریاست له لوري چمتو شوي، چې د تطبیق په صورت کې به د سیمې د اوسېدونکو لپاره د معیاري ښاري ژوند زمینه برابره کړي.
د کور او ښار جوړولو وزارت د هېواد په کچه د منظمې ښاري پراختیا، معیاري ښارګوټو د رامنځته کولو او د بنسټیزو خدماتو د پیاوړتیا په موخه، د نړیوالو معیارونو پر بنسټ د ښاري زېربناوو د طرحې او ډیزاین چارې په دوامداره توګه پر مخ وړي.
