د ګردېز ښار لپاره د پلانونو پر تطبیق او څرنګوالي خبرې وشوې
![picture](/sites/default/files/2024-06/whatsapp_image_2024-06-01_at_3.27.51_pm_0.jpeg)
۱۴۴۵/۱۱/۲۳
د کور او ښار جوړولو وزارت محترم سرپرست وزیر شیخ حمدالله نعماني په خپل کاري دفتر کې د دغه وزارت د مسکن، ودانیزو چارو او د زونونو د پراختیا محترم مرستیال مولوي روح الله احمدي په شتون کې، د پکتیا ولایت د کور او ښار جوړولو ریاست محترم رئیس مفتي عبیدالله رشاد او نورو اړوندو انجنیرانو او مسؤلینو سره وکتل.
په دغه ناسته کې بحث وشو، چې د پکتیا مرکز ګردېز ښار لپاره په تېرو کلونو کې ځینې پلانونه جوړ شوي چې اصلاح ته اړتیا لري او لازمه ده د تطبیق لپاره یې اړوند مسؤلین لاس په کار شي.
په ناسته کې، څو بېلا بېل پلانونه او نقشې تر نظر تېرې او د پام وړ بحثونه پرې وشول چې څنګه کېدای شي د تطبیق په مهال یې په مرکز ګردېز ښار کې شته ښاري ستونزې حل شي.
د ناستې په پای کې، تصمیم ونیول شو چې له مرکز کابل څخه به د کور او ښار جوړولو وزارت د څو بېلا بېلو خو اړوندو ریاستونو مسلکي ټیم د پکتیا مرکز ګردېز ښار ته لاړ شي، شته وضعیت به له نږدې وګوري، موجوده پلانونه به وګوري، اصلاحات به رامنځته کړي او په ټوله کې به یو منل شوی پلان ترتیب او د تطبیق لپاره اړوندې ښاروالۍ ته وسپاري.
د کور او ښار جوړولو وزارت د پکتیا ریاست مسؤلینو ته سپارښتنه وشوه چې د تل لپاره د پلانونو له تطبیق دقیقه څارنه وکړي او چا ته اجازه ورنه کړي چې د پلان خلاف چارې ترسره کړي.