د کور او ښار جوړولو وزیر د کونړ ولایت د مهاجرینو ښارګوټي له ودانیزو چارو لیدنه وکړه
۱۴۴۷/۳/۱۱
د کور او ښار جوړولو وزارت محترم وزیر الحاج مولوي نجیبالله حیات حقاني، کونړ ولایت ته د سفر په ترڅ کې په دغه ولایت کې د مهاجرینو د ښارګوټي له ودانیزو چارو لیدنه هم وکړه.
دا چې باثباته ښارونه د ارام ژوند بنسټ جوړوي، نو پر همدې بنسټ محترم وزیر د یاد ښارګوټي د پرمختیایي چارو بهیر له نږدې ولید او ارزونه یې وکړه.
ښاغلي وزیر الحاج مولوي نجیب الله حیات حقاني، په کونړ ولایت کې د کور اوښار جوړولو ریاست محترم رئیس مولوي نبی الله طلحه او نورو اړوندو مسئولینو ته لازمې لارښوونې وکړې.
نوموړي ټینګار وکړ چې د یادې پروژې چارې باید له کیفیته ډاډمن او پر ټاکلي مهال بشپړ شي، څو د مهاجرو ورونو لپاره د مناسب استوګن ځای برابر شي.
محترم وزیر له مسؤلینو سره د خپلو خبرو پر مهال زیاته کړه، چې اسلامي امارت د راستنېدونکو مهاجرو د استوګنې د شرایطو ښه کولو ته ژمن دی او د کور او ښار جوړولو وزارت به د ښارګوټو جوړولو ته جدي پاملرنه کوي.
کونړ کې د کور او ښار جوړولو ریاست محترم رئیس مولوي نبی الله طلحه وایي، دغه ښارګوټی په ۳۷۴ جریبه امارتي ځمکه کې جوړېږي، چې په کې ۳۸۲ استوګنیزې نمرې په منظمه نقشه وېشل شوې دي.
اوسمهال په دغه ښارګوټي کې، عمومي او فرعي سړکونه د ۱۲.۵ مترو په عرض سره جوړېږي، څو اوسېدونکو ته د تګ راتګ اسانتیاوې برابرې شي.
د څښاک اوبو لپاره د څاهګانو کیندل، د څښاک پاکو اوبو سیستم برابرول، او د فاضله اوبو د مدیریت لپاره بنسټیز اقدامات نور هغه څه دي چې په روانو چارو کې شامل دي.
