د کور او ښار جوړولو وزیر د نوي کابل ښار د ودانیزو چارو جاج واخیست
۱۴۴۶/۳/۶
د کور او ښار جوړولو وزارت محترم سرپرست وزیر الحاج شیخ حمدالله نعماني، په خپل کاري دفتر کې د خاور ودانیز شرکت له مشر محترم سید مقدم امین سره وکتل.
په دغه کتنه کې، په نوي کابل ښار کې د روانو ودانیزو چارو د څرنګوالي، پرمختګ، ستونزو او حل لارو په تړاو خبرې اترې وشوې.
د خاور ودانیز شرکت مشر محترم سید مقدم امین وویل، په اړوند ځمکه کې یې د پلان او نقشې مطابق چارې روانې کړي، چې د شاوخوا پنځه کیلو متره فرعي سړکونو بیخ بناء چارې بشپړې شوي، ځینې سړکونه قیر کولو ته چمتو شوي، یو مارکېټ جوړ شوی، څو بېلا بېل تعمیرونه جوړ شوي، پر مسجد شریف کار روان دی او په ټوله کې د کیفیت او کمیت په اړه هر اړخیزې خبرې وشوې.
ښاغلي سید مقدم امین وویل، غواړي چې د (۷۴۴) جریبه ځمکې سربېره پر زرګونه جریبه نوره ځمکه له تصفیې وروسته او د پلان مطابق د کار کولو اجازه ورکړل شي، تر څو چارې ګړندۍ او د پلان مطابق پر مخ یوسي.
دغه راز نوموړي وویل، د ملکیت سند د ورکړې او څرنګوالي په اړه د کور او ښار جوړولو وزارت نظر، مشورې او لارښوونو ته منتظر دی او په خبره یې په ټولو چارو کې وزارت ته خبر ورکوي.
د کور او ښار جوړولو وزارت محترم سرپرست وزیر الحاج شیخ حمدالله نعماني وویل، د تخنیکي کمېټې له لوري به ترسره شوې چارې و ارزوي، ټولنیز، حقوقي او اقتصادي ارزښت به یې معلوم کړي، نېمګړتیاوې به په ګوته او حل لارې به یې وسنجوي او د چارو د لا پرمختګ او پراختیا لپاره به پر مناسبو لارو چارو غور وکړي.
په نوي کابل ښار کې ودانیزې چارې په چټکۍ پر مخ روانې دي او تمه ده چې په نږدې راتلونکي کې به نور پانګوال هم په یاده سیمه کې پانګونه وکړي.
