د کور او ښار جوړولو وزارت کې به د (۱۳) میلیونه افغانیو په ارزښت یوه پروژه ګټې اخیستنې ته وسپارل شي
۱۴۴۶/۰۴/۱۸
د کور او ښار جوړولو وزارت د هېواد په کچه یو له مهمو او کلیدي وزارتونو څخه دی، چې په پلازمېنه کابل او ولایتونو کې یو شمېر پروژې لري.
یوه له دغو پروژو هغه ده چې د دغه وزارت محترم سرپرست وزیر الحاج شیخ حمدالله نعماني یې د بنسټ ډبره کېښوده او د باکیفیته چارو پر چټکتیا یې ټینګار وکړ.
دغه پروژه د (۱۳) میلیونه افغانیو په لګښت ودانېږي، چې اوسمهال یې ودانیزې چارې خوا اوشا (۹۵) سلنه پرمخ تللي دي.
د دغې پروژې لګښت په خپله د کور او ښار جوړولو وزارت ورکوي او تمه ده چې ډېر ژر به ګټې اخیستنې ته وسپارل شي.
پروژه یو باب درې پوړیزه مسجد شریف دی، چې په یوه وخت کې د (۸۰۰) لمونځ کوونکو ظرفیت لري او د لمانځه د اداء کولو لپاره د تیاري او اودس کولو بشپړې اسانتیاوې لري.
دغه مسجد شریف د وخت په عصري نقشه جوړ او چارې یې د کیفیت او معیار پر بنسټ سرته رسېدلي او روانې دي.
مساجد د مسلمانانو د عبادت ځایونه دي چې د کور او ښار جوړولو وزارت محترم سرپرست وزیر یې د ظاهري ښکلا ترڅنګ په معنوي ښکلا چې د لمونځونو او نورو عبادتونو پر ځای کول دي، ټینګار کړی.
