د ارزګان په ترینکوټ ښار کې د مهاجرینو لپاره د ښارګوټي اصلاحي تفصیلي پلان منظور شو

۱۴۴۷/۱۰/۲۷

د کور او ښار جوړولو وزارت محترم وزیر الحاج مولوي نجیب الله حیات حقاني، د ارزګان ولایت په مرکز ترینکوټ ښار کې د مهاجرینو د ښارګوټي اړوند اصلاحي تفصیلي پلان منظور کړ.

تر دې وړاندې د هېواد په کچه د مهاجرینو د ټو ښارګوټو  تفصیلي پلانونه داسې ډیزاین شوي وو، چې په کې پنځه بسوه یي، لس بسوه یي او پنځلس بسوه یي نمرې شاملې وې او یوازې هغه راستنېدونکو مهاجرو کورنیو ته ورکول کېدې، چې افغانستان کې یې ځمکه نه درلوده، کور یې نه درلود او نه یې هم اقتصادي وضعیت دومره پیاوړی و، چې ځان ته مناسبه سرپناه برابره کړي.

اوس دغه چاره، د اسلامي امارت د زعیم عالیقدر امیرالمؤمنین حفظه الله تعالی و رعاه د حکم سره سم ټولې نمرې پنځه بسوه یي شوې او هرې راستنېدونکې مهاجرې کورنۍ ته ورکول کېږي.

پر همدې بنسټ، اړتیا ده چې د ټولو ولایتونو اړوند د مهاجرینو د ښارګوټو تفصیلي پلانونه اصلاح شي او یو ځل بیا د تطبیق لپاره اړوندو مراجعو ته وسپارل شي.

په دې لړ کې د ارزګان ولایت د مرکز ترینکوټ ښار اړوند د مهاجرو د ښارګوټي تفصیلي پلان هم اصلاح او د محترم وزیر الحاج مولوي نجیب الله حیات حقاني له لوري تائید او لاسلیک شو. 

دغه ښارګوټی په 1826.24 جریبه ځمکه کې جوړېږي، چې په کې 2619 استوګنیزې نمرې او ټول اړین ښاري خدمات، عامه تأسیسات او بنسټیزې اسانتیاوې په معیاري ډول په پام کې نیول شوې دي.