د کور او ښار جوړولو وزارت سرپرست د غزني له ښاروال سره وکتل
۱۴۴۶/۰۲/۰۴
د کور او ښار جوړولو وزارت محترم سرپرست وزیر الحاج شیخ حمدالله نعماني په خپل کاري دفتر کې د غزني ولایت له محترم ښاروال مولوي حمزه منصور سره وکتل.
په دغه کتنه کې د غزني ښار د ښاري وضعیت، شته ستونزو او حل لارو په تړاو خبرې وشوې.
د غزني ښاروال محترم مولوي حمزه منصور وویل، په یاد ښار کې ځینې ستونزې شته چې د پلانونو په جوړېدو او تطبیق سره به حل شي.
په ورته وخت کې، د کور او ښار جوړولو وزارت محترم سرپرست وزیر شیخ حمدالله نعماني وویل، لومړی به د غزني ښار په اړه شته پلانونه وګوري، د اړتیا په صورت کې به تخنیکي ټیم ولېږي او له هغې وروسته به تصمیم ونیول شي، چې تفصیلي او یا هم د بهسازۍ پلانونه چمتو شي.
ښاغلي شیخ حمدالله نعماني وویل، هڅه به وکړي چې د غزني ښار ستونزې حل کړي او د ښاري تخلفاتو مخنیوي په اړه جدي ګامونه پورته شي.
د کور او ښار جوړلوو وزارت د منظمي ښاري ودې او پارختیا په موخه بېلا بېل پلانونه طرح او ډیزاین کوي او بیا یې د تطبیق لپاره اړوندو ښاروالیو ته سپاري، چې بېرته د خپلو پلانونو له ښه تطبیق څارنه او نظارت هم کوي.
