د کور او ښار جوړولو وزارت تخنیکي ټیم، د کابل ښار په لسمه ناحیه کې د اریا ښارګوټي له وضعیت څارنه وکړه
۱۴۴۸/۲/۷
د کور او ښار جوړولو وزارت د کیفیت د کنټرول او د ښاري سرغړونو د مخنیوي محترم لوی ریاست اړوند، د ښاري تخلفاتو د مخنیوي محترم ریاست تخنیکي ټیمونو، د وزارت د مشرتابه د لارښوونې او د خپل منظم کاري پلان له مخې، د کابل ښار د لسمې ناحیې اړوند د آریا ښارګوټي له وضعیت څخه ساحوي څارنه وکړه.
د څارنې په بهیر کې، د ښارګوټي د ساحوي نقشې، سوداګریزو او استوګنیزو برخو، عامه تأسیساتو، د سړکونو شبکې، کانالیزاسیون او برېښنا شبکې وضعیت په هر اړخیز ډول و ارزول شو.
د څارنې پر مهال، اړین معلومات او تخنیکي اسناد راټول شول او د اریا ښارګوټي له منظور شویو نقشو او ښاري پلانونو څخه د احتمالي سرغړونو موارد ثبت شول.
په دغو مواردو کې، د استوګنیزو او سوداګریزو ساحو د کارولو غیرقانوني بدلون، د سړکونو بندول او په شنو ساحو کې د هټیو او رستورانتونو جوړول شامل دي.
د یادونې وړ ده، چې د دې څارنې بشپړ، مستند او تخنیکي راپور به د ټولو ارزونو له بشپړېدو وروسته د لازم تصمیم نیولو په موخه د کور او ښار جوړولو وزارت محترم مشرتابه ته وړاندې شي.
د دغو څارنو اساسي موخه، د ښاري پلانونو دقیق تطبیق، د ښاري سرغړونو او غیرمعیاري ودانیزې پراختیا مخنیوی، د ودانیز کیفیت لوړول، د ښاري نظم ټینګښت او د ښاري مدیریت پیاوړتیا ده.
