د کندهار ښار د نهمې ناحیې په مارکیټونو کې د سرغړونو د اصلاح لپاره څارنه او خبرتیا ترسره شوه
۱۴۴۷/۰۸/۱۷
د کور او ښار جوړولو وزارت د ښاري سرغړونو د مخنیوي د عمومي ریاست په لارښوونه، د کندهار ښار اړوند د نهمې ناحیې په دوو مارکیټونو کې چې پیکونه یې په عامه پلېلارو کې ځای پر ځای شوي وو او پنځه بابه دوکانونه یې د څلور بابه دوکانونو په معیار فعالیت کاوه، د پنځم دوکان مالک له ټاکل شوي اصولو سرغړونه کړې وه، د تخنیکي ټیم لخوا ټول فعالیتونه موقتا بند کړل شول تر څو پیکونه اصلاح او اړوند امر ترلاسه شي.
د یادو سرغړونو په اړه اړوند ښاروالۍ ته هم رسمي مکتوب استول شوی، ترڅو د سرغړونو د اصلاح چارې په منظم ډول ترسره شي.
د کور او ښار جوړولو وزارت تخنیکي ټیمونه په مرکز او ټولو ولایتونو کې د ښارونو د ودانیو، عامه تاسیساتو او پروژو د تطبیق څارنه ترسره کوي. د یادو ټیمونو موخه دا ده چې ټولې ودانیزې چارې د ملي او نړیوالو معیارونو سره سم، د نقشو او قراردادونو په اساس، په معیاري او دوامداره ډول تطبیق شي.
