د کاسا زر پروژې په اوږدو کې د مالکیت حق تثبیت چارې چټکې شوي دي
د ښار جوړولو او ځمکو وزارت د ټولګټو پروژو د انسجام چارو ریاست له لارې په پنجشېر، کاپیسا او ننګرهار ولایتونو کې د کاسا زر د برښنا انتقالي پروژې تطبیق لپاره د مالکیت حق تثبیت چارې چټکې کړي دي.
تر دې دمه د پنجشېر ولایت په پریان، خاواک، خېنج او مرکز بازارک کې د ستنو ۱۴۲ ځایونه، د کاپیسا په کوهبند او لومړۍ حصې کوهستان کې د ستنو ۳۸ ځایونه او د ننګرهار ولایت په مهمندو، ګوشتې او لعل پورې ولسوالیو کې د ستنو ۲۶۱ ځایونو د مالکیت حق تثبیت، بیې ايښودنې او ارزښت موندنې چارې ترسره شوي دي.
په پنجشېر کې له یادو ستنو څخه ۱۳۲ دولتي او ۱۰ شخصي، په کاپیسا ولایت کې ۲۴ ستنې دولتي او ۱۴ ستنې شخصي او په ننګرهار کې هم د ستنو نصب زیات شمېر ځایونه دولتي تثبیت شوي دي.
اوس مهال د دولتي ځمکو او ملکیتونو په توګه د یاد شمېر ستنو د نصب ځایونو تثبیت سره د افغانستان برښنا شرکت له لوري د ستنو نصب ته زمینه برابره ده.
د کاسا ۱۰۰۰ پروژې له لارې چې د نړیوال بانک په مالي مرسته تطبیق کیږي، د قرغزستان او تاجیکستان ۱۳۰۰ میګاواټه برښنا د افغانستان له لارې پاکستان ته لېږدول کیږي. د دغې سترې پروژې پر مټ، په زرګونه کورنۍ په افغانستان او پاکستان کې له برښنا څخه برخمنې کیږي.
