د کابل ښار په ځینو ناحیو کې ښاري تخلفات په نښه شول
۱۴۴۷/۳/۲۴
د کور او ښار جوړولو وزارت، له ښاري تخلفاتو د مخنیوي ریاست محترم رئیس مولوي عبدالمنان حقاني وایي، د ریاست اړوند تخنیکي ټیم یې د کابل ولایت په شپږمه او دیارلسمه ناحیه کې د ښاري سرغړونو څارنه او ارزونه وکړه.
ښاغلی مولوي حقاني وایي، تخنیکي ټیمونو د پلان له مخې، د عام المنفعه تاسیساتو، استوګنیزو او سوداګریزو ودانیو، د سړکونو او ترانسپورتي شبکاتو، د برېښنا شبکاتو، اوبو رسولو او کانالېزاسیون په برخو کې د کابل ولایت په شپږمه او دیارلسمه ناحیه کې له ښاري وضعیت څارنه او ارزونه وکړه.
نوموړی وایي، د څارنې او ارزونط په پایله کې ثابته شوه چې د امید سبز (حاجي نبي) ښارګوټي کې ځینې خپلسرې چارې ترسره شوي چې باید مخنیوی یې وشي.
د مولوي عبدالمنان حقاني د معلوماتو له مخې، سوداګریزې ساحې په استوګنیزو نمرو تبدیل شوي، په ځینو ساحو کې لارې او سړکونه بند شوي او داسې نورې نیمګړتیاوې هغه څه دي چې ښاري تخلفات ګڼل کېږي.
د کور او ښار جوړولو وزارت، له درنو هېوادوالو غواړي چې د هر ډول ابادۍ په مهال د دغه وزارت پلانونه په پام کې ونیسي، خپلې چارې دې د پلان مطابق ترسره کړي او ښاري بې نظمیو دې مخنیوی وکړي.
