د کابل ښار پنځمه ناحیه کې د ناقانونه ساختماني چارو مخه ونیول شوه
۱۴۴۷/۱۲/۰۴
د کور او ښار جوړولو وزارت، د ښاري سرغړونو او د پروژو پر تطبیق د څار محترم عمومي ریاست اړوند د ښاري سرغړونو د مخنیوي ریاست تخنیکي ټیمونو، د دوامدارو نظارتي پروګرامونو په لړ کې د کابل ښار پنځمې ناحیې اړوند د سره میاشت ښارګوټي له ساختماني چارو څخه ساحوي تخنیکي څارنه ترسره کړه.
د یادې سیمې څخه تر دې وړاندې هم څو ځله تخنیکي لیدنې او ارزونې ترسره شوې وې او د پروژو مالکینو ته سپارښتنه شوې وه، څو هغه ساختماني چارې ودروي چې د ښار جوړونې له اصولو، مقرراتو او منظور شوو پلانونو سره په ټکر کې دي، ترڅو په دې اړه د وزارت مقام وروستۍ پرېکړه وشي.
د څارنې پر مهال څرګنده شوه چې ځینې ساختماني فعالیتونه په پټه توګه دوام لري، له همدې امله ټولې هغه چارې چې د ښاري پلانونو خلاف روانې وې، ودرول شوې، له سرغړوونکو اشخاصو څخه لیکلې ژمنې واخیستل شوې او هغه ودانۍ چې ساختماني کارونه پکې روان وو، مهر او لاک شوې.
د دغو څارنو اساسي موخه د ناقانونه ساختماني فعالیتونو مخنیوی، د ښاري نظم تأمین، د ښاري پلانونو دقیق تطبیق او په کابل ښار کې د غیرمعیاري ودانیو د پراختیا مخنیوی یاد شوی دی.
د ښاري سرغړونو پر وړاندې به نظارتونه او قانوني اقدامات په جدي ډول دوام ولري، څو ټولې ساختماني چارې د نافذه اصولو او تخنیکي معیارونو مطابق ترسره شي.
