د کابل ښار پراختیایي پلان او لوړپوړیزو او لږ پوړیزو ودانیو په اړه ګډه ناسته وشوه
29/7/1445
د کور او ښار جوړولو وزارت او د کابل ښاروالۍ ګډه ناسته وکړه او په کې یې د کابل ښار پر پراختیا، لوړپوړیزو او لږ پوړیزو ودانیو او د زیانمن اشخاصو د حقوقو خوندیتوب په اړه بحثونه وکړل.
دغه ناسته چې د کور او ښار جوړولو وزارت د محترم سرپرست وزیر شیخ حمدالله نعماني په مشرۍ ترسره شوه، د کور او ښار جوړولو وزارت مسؤلینو د کابل ښار لپاره د جایکا له لوري جوړ شوي ماسټر پلان په اړه دلایل وړاندې شول او د کابل ښاروالۍ د استازو له لوري د ساساکي پلان او ښاري طراحۍ پلان په اړه دلایل وړاندې شول.
له دغه بحثونو موخه دا وه، چې څنګه کېدای شي د پلانونو ترمنځ توپیرونه او ځانګړتیاوې په ګوته شي، د کابل ښار د سړکونو غځولو او انډولیزې پراختیا په موخه د جوړو شوو پلانونو تطبیق وشي، د زیانمن اشخاصو حقوق خوندي شي، او راتلونکي کې له هر نوع خپل سریو مخنیوی وشي.
ښاغلي شیخ حمدالله نعماني وویل، د لوړپوړیزو ودانیو له کبله د هغوی د چم او ګاونډ اوسېدونکي په حقوقي او تخنیکي لحاظ زیانمن شوي، چې باید حقوق یې ورکړل شي.
نوموړي د کابل ښاروالۍ ته دنده وسپارله، چې د کابل ښار د زیان منونکو اوسېدونکو د حقوقو د اعادې لپاره دې پر یوه طرحه کار وکړي او په بله ناسته کې دې د تشریح او تائید لپاره وړاندې کړي.
د کور او ښار جوړولو وزارت د ښارونو لپاره پلانونه جوړوي، چې اړونده ښاروالیانې یې د تطبیق مسؤلیت په غاړه لري او د کور او ښار جوړولو وزارت یې د ښه تطبیق په موخه څارنه هم کوي.
